瀑布灣

豔麗灣河

地區
香港島
遊覽時間
2.0
小時
難度
2.0
/ 5
最後更新
6/9/2020

你知唔知港島除咗半山同叮叮之外,原來仲有一個天然瀑布係華富邨呢? 華富邨仲咗神秘傳說,仲有一個遠眺南丫島、廣闊海景嘅寧靜石灘同燒烤場,消暑之餘仲適合一家大細𠻹!而且依到仲係攝影發燒友必到之處,潮汐下拍低雞蛋仔奇景!

薄扶林瀑布約 15 米高,位於瀑布灣公園。開埠初期仲係港島居民嘅取水處,而且因為氣勢澎拜,曾經有「鼇洋飛瀑」同埋「扶林飛瀑」嘅美譽,仲係「新安八景」同「香港八景」之一𠻹!後期因為政府為咗解決香港用水需要,所以係薄扶林谷地興建水塘,以致1863年水塘建成之後,扶林飛瀑截咗一半,變成依家所見嘅模樣。而瀑布對出就係寧靜嘅石灘,旁邊有一間廢置石屋以及日佔時留底嘅軍事瞭望台增添咗唔少歷史氣氛。亦因為以前依一帶前身係亂葬崗,亦曾經日軍佔領過,所以流傳唔少嘅故事。

除咗神秘故事,瀑布灣亦係香港傳統文化習俗佔一席。每逢農曆八月十五,瀑布灣擔任住富有香港非物質文化遺產之稱-薄扶林舞火龍嘅終點。當日村民會撐起火龍,火龍追隨「龍珠」沿薄扶林道途經華富邨,步行至瀑布灣。當村民拜神後,就會合力把火龍抬出海中,沉下海底,完成「龍歸滄海」儀式。依家為免污染海洋,所以會將火龍移返陸上處理。可見依到嘅人文歴史係幾咁豐富。

除咗瀑布,公園內仲有公共燒烤場,可以對住大海景燒烤,同朋友談天說地,咁就一日,都咪話唔歎。燒烤到黃昏時間,仲可以係鄰近華美樓方向,沿樓梯行到底係海邊尋找雞蛋仔!雞蛋仔佔地約二百呎,而佢地其實係保護電䌫嘅人工建築物,水泥因為長期俾海水洗擦之下,表面變成一個個光滑、突起嘅雞蛋仔。雞蛋仔要係潮退先有機會見到,配搭黃昏仲係一大特色靚景!唔少攝影發燒友專程黎到就係為咗捕捉雞蛋仔嘅身影。

係海邊附近,仲有一個人手搭成嘅泳棚,旁邊更有小廟供泳客拜一拜再落水,保佑平安。大家有機會不妨探索探索,尋找自己嘅私人秘景!

交通資訊

乘坐4號巴士於華富商場下車,沿瀑布灣道往下到瀑布灣公園,執右級往下走可到達華富瀑布。
乘坐970號巴士於華富商場下車,沿瀑布灣道往下到瀑布灣公園,執右級往下走可到達華富瀑布。
乘坐23號小巴於華富商場下車,沿瀑布灣道往下到瀑布灣公園,執右級往下走可到達華富瀑布。

備註事項

留意潮漲時間,注意安全。

地圖