.jpeg)
屯門作為香港其中一個沿海地區，除左屯門人騎牛返學嘅傳言之外，原來仲有一個沿海而建嘅海濱花園！花園全長2公里，由避風塘方向嘅慧豐園側邊空地，一直延伸至蝴蝶灣，無論係花園嘅邊個位置，都可以見到海嘅存在，可以話係180度無敵大海景！雖然有多個出入口，但想盡情欣賞海景，趁呢個機會放鬆下嘅朋友，筆者就推薦大家，由慧豐園側邊嘅入口開始行喇！
.jpeg)
海濱花園
沿住屯門碼頭嘅主馬路，向邁亞美海灣（藍色建築群）行，到盡頭就會見到右邊有個海濱花園嘅入口。雖然都係同一個公園，但因為比較偏離商場同交通中心樞紐，人流都會比較少，適合大家嚟散步，紓緩繃緊嘅精神狀態！沿路都會有唔少長凳同涼亭，畀大家坐喺度休息之餘，細心觀賞呢片寧靜嘅避風塘景色同海景。沿路深入，就會見到一條向外延伸嘅步道，原來呢條就係避風塘嘅堤岸！
.jpeg)
平時呢個位置都會吹住涼涼海風，最適合影相打咭！筆者最推薦大家夜晚嚟呢條堤岸行下，好運嘅話仲會見到鬧市間嘅幾粒星星㗎！如果大家去過其他海濱公園，就會覺得，淨係得海景都無咩特色。而屯門海濱花園最別具特色嘅地方，就係可以一次過滿足多類人嘅需求！如果係好似筆者咁，鍾意睇下海景，思考人生嘅朋友，就可以行沿海邊而建嘅長廊，吹住海風，聆聽自己嘅心聲，有時仲會見到有人係度悠閒釣魚添！如果想做下運動，或者漫步樹蔭下，就可以行隔離嘅步行徑，想像下住係側邊屋苑既生活享受！
.jpeg)
渡輪碼頭
渡輪碼頭就位於輕鐵總站對面，位置便利，唔單止可以搭返船出東涌，早嚟嘅朋友甚至可以考慮搭船去埋大澳！而渡輪碼頭嘅右邊，就係香港三個可以搭船去澳門嘅碼頭之一喇！
.jpeg)
啟豐商場
見到渡輪碼頭之後，再向前行少少，就係啟豐商場。喺商場嘅靠海位置，可以見到有好多餐廳都提供戶外座位，而喺比較後嘅位置仲有一間向海café，大家不妨可以嚟食返個視覺同味覺完美融合嘅一餐！筆者就特別推薦一間叫美味屋嘅小餐廳，麻雀雖小，五臟俱全，各式美食選擇多之餘，仲可以選擇唔同嘅特色飲料，實在一舉兩得！行入商場，喺一排餐廳之中，仲可以發現到一間以平民價錢就買到高級甜品享受嘅小店，呢度就留返畀大家自己去發掘喇！
.jpeg)
喺香港呢個好似蟻窩一樣人口密集嘅城市，表面上可能十分無趣，但其實好多有趣嘅事物，需要我哋自己去細心觀察先會揾到。要睇海景，唔一定要去到澳洲、英國，有時只要我哋「停一停，諗一諗」，行入幾步，就會發現我哋平時忽略咗嘅美好風光。