搭地鐵到荃灣站，搭82號小巴，喺城門水塘小巴總站入口落車。正式出發之前，可以喺入口附近嘅小食亭買補充品，不過入到公園就要留意唔好隨便拎出嚟食，如果唔係就會吸引咗一大班馬騮埋黎搶食㗎啦。一直沿路行，就會見到條路兩邊種滿白千層，白千層整齊咁喺小路嘅兩旁排排企、曬太陽，景致真係令人嘆為觀止！繼續一直行，就會去到水塘附近，望住白千層喺湖面嘅倒影，偶爾仲有馬騮經過，會有種同大自然融為一體嘅感覺，真係好療癒啊！
離開時可以去城門郊野公園遊客中心參觀一下，中心入面設有展覽介紹水塘嘅歷史。最後去番入口位置就可以搭番巴士離開。
生態知多啲：
白千層每年向外生出新皮，老樹皮會留喺樹上面，層層推出，形成保護層。因為咁，白千層嘅樹幹累積咗好多層白色嘅樹皮，所以就叫做白千層啦。白千層樹幹筆直，啱晒做馬路邊嘅行道樹；不過細心留意會發現，新發展嘅市區比較難見到白千層，因為汽車嘅廢氣好容易將白千層嘅樹皮染黑，令人覺得唔乾淨，所以喺新市區比較難見到呢種樹。
