泥灘平坦而開揚，相對其他沙灘人流較少，所以好容易就影到靚相。泥涌對住嘅係平靜嘅吐露港，可以遠眺到對岸高大嘅八仙嶺同埋船灣淡水湖附近嘅白沙頭，配埋涌口嘅河水倒影，可以影到海天一色、仙境一樣嘅天空之境！
講開泥灘地貌，當然要提下呢度嘅植物同小動物啦！其實泥涌嘅生態價値非常高，鹹淡水交界同岸邊嘅沼澤成為左呢啲特別物種嘅居所。喺小徑行入去你會發現平時喺市區唔會見到嘅藤狀植物，泥灘上亦有好多蠔同蟹仔，一家大細去嘅話小朋友都會大開眼界。如果唔怕少少泥濘嘅話，潮退嘅時候可以行出泥灘影靚相添。
灘上面有一座因為日久失修而冧咗嘅渡頭，小心啲企上去影相都幾有特色架。潮漲嘅時候海水會淹沒泥灘，剩返渡頭嘅橋橔露出水面，別有另一番風味。唔夠候嘅話，沿住灘邊嘅小徑行入去會見到一個新嘅泥涌碼頭，都有影相位架！
隨住城市發展，好多沿岸地方都俾政府或者發展商睇中靚景而起樓。例如，大埔龍尾灘即將興建人工沙灘作康樂用途。政府雖然進行一系列嘅生物遷移，將指定嘅海洋生物，包括海星、海膽等搬到附近嘅汀角東海域，但成效被環保團體質疑，亦難以重建完整嘅生態系統。首先，龍尾嘅地理位置容易聚積污染物，水質唔適宜作大眾康樂用途。再講，大家究竟需要一個「人工沙灘」游水，定係天然完好、生生不息嘅泥灘？自然係珍貴嘅資源，發展將會帶來不可逆轉嘅破壞，到以後我地想睇返海星、蟹仔，可能已經再無機會喇！好似泥涌咁有生態價值嘅地方都消失得七七八八了。為左小動物，為左下一代，我地都要好好珍惜香港僅存嘅各樣生態環境。
