❸ 本文內容摘自第三方資料,僅供行程參考之用。

獅子山

承載香港人精神嘅鬼斧神工

景點分類

行山勝地

所在地區

九龍

建議遊覽時間

4

小時

遠足徑難度

3

最後更新日期

23/4/18

交通資訊
備註事項
地圖

獅子山

承載香港人精神嘅鬼斧神工

小編細細個就覺得獅子山好神奇——酷似獅子嘅大石屹立喺石屎森林之上,的確係大自然鬼斧神工之作;但係對好多香港人嚟講,獅子山除咗係一塊好靚嘅石頭之外,更加係一個地標、一個有獨特象徵意義的標誌。中國有云「不到長城非好漢」,而獅子山代表香港人嘅拼搏精神,身為香港人嘅你,點都要上一次獅子山!

由慈雲山出發,沿馬路上升,好快就會見到山徑嘅交滙點。沿着麥理浩徑拾級而上,雖然上斜路有啲吃力,但係望住景觀越嚟越開揚,更加可以係遠處見到「獅頭」,令人心曠神怡,一啲都唔會覺得攰。經過M104標距柱之後就會見到分岔路,分別經山頂或者山坳去回歸亭。上山頂嘅路一啲都唔輕鬆,不過到頂嘅時候,你會發現一切辛苦都係值得嘅。企喺495米高嘅山峰俯瞰九龍,可以飽覽整個石屎森林;好天嘅話甚至連港島嘅IFC同埋太平山都望到!不過如果同行有小朋友或者初試行山者,都係安全至上,量力而為啦。

往‍山頂嘅分岔路

喺獅身影完相之後,就可以喺另一邊落山接返麥理浩徑往沙田大圍。中途會經過香港回歸紀念亭,若果剛才睇風景意猶未盡的話,呢度都係一個遠眺九龍景色嘅好地方。喺新界開始發展之前,村民搬住貨物來往九龍都係靠呢啲山路;而家我哋唔使再咁樣行,同大自然嘅關係亦疏遠咗啦。

‍香港回歸紀念亭

行行下又會見到指示牌,今次嘅分岔路可以通去望夫石。望夫石由突石 (Tors) 組成,形狀就好似婦人抱着個仔望天打掛。坊間流傳一個故事,相傳一個婦人為搵番失散嘅丈夫,每日都上嚟山上眺望沙田,登山望海,希望等到丈夫歸來。有一日,婦人帶住兒子如常登山眺望時,突然間雷電交加,母子不幸被雷擊中,自此就化為望夫石。望夫石傳說淒美動人,巨石奇觀亦令人不禁駐足欣賞。睇過兩大奇石,係時候打道回府喇。順住山路落山,好快就會到達大圍啦。

‍往大圍紅梅谷嘅石級

望夫石嘅傳說信唔信都好,我哋都都不得不讚嘆自然界嘅奇妙。大自然固然係我哋城市生活嘅佈景板,其實同我哋嘅關係好接近:有啲地方好似獅子山和望夫石一樣,有家傳互曉嘅故事,甚至有象徵意義,承載住一個民族嘅精神。最重要嘅係呢度一草一木,不停為地球呼吸,將我哋多餘嘅碳排放吸收,孕育生命,讓我哋嘅後代得以延續。

交通資訊

港鐵黃大仙站落車後步行上沙田坳道起點/九龍塘又一城坐73號小巴到法藏寺落車前往起點。

路線參考:https://goo.gl/AtAo4w

備註事項

獅子山頂一段山徑較難行及具危險性,無經驗者不宜獨自前往。

地圖

其他相似景點