九龍水塘

勇闖猴王領土

地區
新界東
遊覽時間
3.0
小時
難度
2.0
/ 5
最後更新
5/9/2020

九龍水塘位於金山郊野公園,雖然水塘名稱有九龍兩個字,但係九龍水塘並唔係位於九龍,而係屬於沙田區。九龍水塘群由九龍水塘、九龍副水塘、九龍接收水塘同石梨貝水塘組成,由於水塘並唔係好大,所以好容易行完呢幾個水塘!如果大家嘅體能好好,不妨從城門水塘起步,沿麥理浩徑6段行到去大埔道,更加可以觀賞到二戰時期醉酒灣防線嘅遺跡添!

歷史

港英政府為咗提供食水比九龍同新界南部嘅居民,於是係上世紀初展開興建水塘的工程,係針山以南及同畢架山以西一帶建造儲水設施。及後,九龍水塘於1910年落成啟用,成為新界第一個水塘。

戰時碉堡

由城門水塘出發,大約15分鐘之後就會見到碉堡遺跡,呢度係香港保衛戰嗰陣嘅重要據點,宜家仲保留咗好多戰時遺跡,例如軍事座標、機槍堡同碉堡陣地。碉堡以地下隧道連結,隧道就用倫敦街道命名,例如牛津街同舒佛畢利巷等,用意係為咗方便英軍溝通同慰藉思鄉之情。城門碉堡嘅功能在於防禦日軍突襲。不過係1941年12月,碉堡受到日軍突擊並隨即失守。時至今日,我地依然可以見到機槍堡天花密集嘅彈痕,感受到戰時嘅光景。

馬騮天堂

相信大家都聽過金山有個別名,就係馬騮山!山如其名,金山郊野公園入面真係住咗好多馬騮,佢地大多都係獼猴,並穩定咁係金山同城門水塘一帶繁衍。咁大家又知唔知點解香港會有馬騮呢?事源港英政府建造九龍水塘嗰陣發現一種叫馬錢嘅植物,如果人食用咗會中毒,但係馬騮食咗就無事,所以就引入咗馬騮,幫手食有毒植物。呢份絕世筍工淨係食玩瞓,令到馬騮大量繁殖,直至近年漁護署幫馬騮做絕育手術,控制返佢地嘅數量係2000隻左右。

九龍水塘

九龍水塘嘅堤壩以花崗岩建成,而且採用弧形設計,非常獨特㗎,充滿殖民時期嘅特色。唔單止咁,為咗增加儲水量,九龍水塘嘅水壩亦都十分高,企係水壩上面更加可以遠眺九龍半島嘅景色!另外,九龍水塘嘅建築物群落亦係2009年被列入法定古蹟,好有歷史價值㗎!

交通資訊

乘72、81巴士,在九龍水塘站下車

備註事項

切勿破壞或塗污文物

不要隨處遺下垃圾,此舉會造成水污染及影響生境

切勿影響野生動物的生境及餵飼猴子


地圖