錦田

錦田
地區
新界西
遊覽時間
1.0
小時
難度
1.0
/ 5
最後更新
1/2/2021

睇落平平凡凡嘅錦田近年已經發展成為文化藝術本地遊嘅好去處。有時候,我哋喺網上會見到關於紅磚屋、跳蚤市場等嘅資訊。今日,V'air小編就為大家整合4個錦田值得遊覽嘅地方,相信各位今個週末嘅閒暇有著落啦!

錦上路跳蚤市場

好多人出國旅行嘅時候都會特登去當地嘅跳蚤市場行吓,買吓嘢,感受吓當地人民週末嘅生活。咁你又知唔知其實香港都有跳蚤市場吖?錦上路跳蚤市場位於錦上路地鐵站旁邊,逢星期六、日同公眾假期會開放俾市民入去行吓㗎。

跳蚤市場內有超過160個各式各樣嘅攤位,你想搵衣食住行嘅任何嘢都得!
市集中央嘅「富士山下」。
我地可以喺呢度購買香港同外地嘅舊郵票。

店內仲有售賣一啲由店主自己親手製作嘅藍染飾物同工藝品。因為呢度嘅每一件手工藝品都係人手製作,所以每一件都係獨一無二。如果你想要特定嘅藍染花款,仲可以同店主訂造,幾個禮拜後就可以攞到獨一無二嘅藍染飾物㗎啦。

跳蚤市場的Facebook專頁:https://zh-hk.facebook.com/ksrfm/

盈匯坊

盈匯坊係一個設計新穎,環境優美嘅商場。

商場外圍設置咗一啲座椅,大家可以望住呢一片帶啲歐陸風情嘅風景,同朋友傾吓計。

盈匯坊裡面有一間細細地嘅咖啡室——MF Cafe,呢度有售賣各式食物,由中式套餐到台式甜品,喺呢度都會食到架。行耐咗有啲攰黎休息就最適合不過啦!

錦田紅磚屋

鍾意行市集嘅你去完錦上路跳蚤市場未夠過癮?咁就千祈唔好錯過錦田紅磚屋啦!呢度前身係蠟燭工廠,宜家已經搖身一變,成為年輕人最愛嘅室內市集啦!

呢度嘅特色紅磚設計為成個市集加添咗一啲古典風格。

市集入面其中一間最具特色嘅舖頭就係呢間古董收藏店。店主以前係一個設計師,後來黎紅磚屋開設呢間店。店入面售賣一啲經典嘅古董擺設,好有紀念價值㗎!

既然紅磚屋嘅前身係蠟燭工廠,有蠟燭店喺市集入面當然係理所當然嘅事啦!Angel Candle係香港本地嘅蠟燭店,佢地嘅蠟燭都係手工製作㗎。

店入面有唔同大小,唔同顏色、香味嘅手工蠟燭。仲有加入驅蚊成分嘅驅蚊蠟燭添!

行行吓覺得餓,唔驚!市集裡面都有各式各樣售賣唔同小食嘅攤位。呢個檔口售賣嘅產品係本地製造,仲要使用本地農產品做原材料添!

錦田壁畫村

錦田壁畫村由郭老師同一班熱心義工建立,目的係透過壁畫藝術,推動香港嘅年輕人同市民互助互愛。裡面嘅壁畫大部分都係由義工自發作畫㗎!

村入面唔少嘅壁畫都蘊含住愛呢個主題。呢幅由郭老師繪畫嘅「十五與阿美」完美咁刻畫咗老夫老妻之間嘅恩愛。

義工Gigi Yung繪畫嘅「富記貓團」喺以前錦田著名嘅富記飯店大排檔。壁畫以貓咪一齊團聚食飯勾畫當年錦田居民新年會一齊食團年飯嘅愛同熱鬧。

呢一棵「育心之樹」看似簡單平凡,其實佢係喺2019年由廣大市民以一人一心嘅方法畫出黎架!呢幅畫係送俾前線嘅老師,為佢地打氣㗎!

壁畫村入面仲有唔少來自藝術家嘅創作添。其中一個村內壁畫嘅常客就係「小wink子。畫下地球腳印」啦!

呢幅係其中一幅小wink子嘅作品——春。夏。秋。冬,壁畫勾畫咗大自然四季嘅風光,表達萬物互相依靠嘅關係。

呢一幅壁畫係由郭老師繪畫,上面寫住「錦鯉聚樂河秀水清,田廣戶富百花芳馨」,祝福錦田繼續繁榮。而隔離嘅樂悠悠茶座係大家行完壁畫村後可以休憩嘅好地方。

茶座裝修時尚,配合壁畫村嘅藝術氣息,裡面售賣各式食物。

錦田壁畫村的官方Facebook專頁:https://www.facebook.com/kamtinmural/

交通資訊

錦上路地鐵站B出口側面。

備註事項

地圖

最新專題