❸ 本文內容摘自第三方資料,僅供行程參考之用。

龍脊

小西灣/黑角頭/大浪灣/龍脊

所在地區

香港島

建議遊覽時間

5

小時

遠足徑難度

最後更新日期

28/6/17

交通資訊
備註事項
地圖

龍脊

小西灣/黑角頭/大浪灣/龍脊

今次介紹地方係由 Eunice & friends + families同筆者親身試行後推介,中意戶外活動嘅朋友仔,記得搵個週末,拉埋親朋戚友一齊去啦,大人小朋友都啱哂!

有咩舒服得過鬱鬱蔥蔥嘅景色近在咫尺,帶齊裝備黎到小西灣,有兩條路行,沿龍躍徑斜斜地嘅水泥路可以輕鬆上山;亦可以從樹影樂園行入黑角徑,盡頭係黑角頭燈塔,右手邊就有條隱徑上山,都通得返龍躍徑,如此走走探探,穿山入林,都別有一番感覺。

龍躍徑黎到尾聲,就上砵甸乍山郊遊徑,沿路都係上上落落既石級,無咩難度,輕輕鬆鬆就可以行上山,從砵甸乍山觀景台仲可以眺望將軍澳、東龍洲等遠處景觀。分叉口往大浪灣方向繼續行,準備到達中間站/目的地—大浪灣。

大浪灣實在灣如其名,呈U字型嘅海灣浪濤洶湧,無怪為香港嘅衝浪勝地。唔好忘記去睇下大浪灣既古代時刻,係香港既法定古跡,相信係早期嘅漁民刻石以求鎮撫怒海、保佑出海漁獵平安,圖案見到咩?不如交由你地去探索下啦!香港咁難得有呢啲古跡文物保存落黎,值得大家好好對待,等歷史文化繼續傳承落去。

如果係半日遊嘅你,呢到就係你嘅終點站,換條泳褲,攤係幼沙上聽住驚濤拍岸,一身都鬆哂;而自問好似筆者咁不熟水性,打算行足一日山,係士多補充下物資,就衝上港島徑第八段,朝龍脊進發啦!

而上龍脊呢段路—馬塘坳—難度就提高些許啦,因為唔再有靚靚嘅石級,多咗碎石,帶住小朋友挑戰就要多加注意,但上山嘅路沿途綠樹成蔭,即使炎炎夏日都唔會好曬,唔知唔覺就上到龍脊啦!你睇,真係幾似龍嘅背脊窩!係山頂俯瞰大浪灣、東龍洲、石澳,遠眺香港島以東嘅海域,豪氣衝上喉嚨,真係忍唔住大聲呼喊,咩壓力都乘風而去。最後慢慢行落山,就可以搭9號巴士返返市區,全日嘅行程就到呢到為止。

交通資訊

9:30 小西灣出發(行黑角頭隱徑會花費更多時間)

9:50 上砵甸乍山郊遊徑

11:00 到達大浪灣,結束半日遊既行程或稍事休息、補充物資

12:00上馬塘坳

13:00往打爛埕頂山登上龍脊(無耐會見到分叉路,一條上龍脊,一條落山去土地灣,當然上山啦!)

14:00 上到山頂,遠眺景色

15:30 到達土地灣,搭9號巴士返市區

備註事項

龍脊,小西灣,大浪灣,龍脊,土地灣,龍躍徑,行山,港島徑

地圖

其他相似景點