❸ 本文內容摘自第三方資料,僅供行程參考之用。

川龍

上山飲茶 有機農田

所在地區

新界西

建議遊覽時間

4

小時

遠足徑難度

2

最後更新日期

24/1/18

交通資訊
備註事項
地圖

川龍

上山飲茶 有機農田

想親親大自然,又無乜體力行山?想食到真點有機蔬果,又唔知去邊度買?今次嘅行程啱曬大家!

大家或者聽過行山客鍾意去「川龍飲茶」,其實川龍位於大帽山腰,係一條歷史長達五百多年嘅客家村落,入面有曾氏原居民聚居。川龍設有兩間歷史悠久嘅自助茶樓——端記同彩龍茶樓,出名菜式包括大帽山農場出產嘅新鮮西洋菜同山水豆腐花,仲有質感細滑嘅即叫即製腸粉添!自助茶樓即係咩都要自己黎,包括搵位、攞點心、攞餐具等,富有舊茶樓嘅風味。

大家喺川龍飲完茶之後,可以沿住大馬路行去附近嘅「悅來農莊」。離遠已經見到農莊嘅招牌,寫住「合時蔬菜-生菜、油麥 歡迎參觀選購」。

一行到農莊門口,農夫主動走出黎帶遊客入去參觀。農夫先生叫羅國生,上幾代已經開始係川龍耕種。同羅先生傾計之後,發現佢係退休後才進行耕作,一圓年幼時係鄉下耕種嘅夢想。除了耕種外,羅先生得閒嘅時候鍾意習書法同寫詩,後生時仲曾經出版詩集。農舍入面見到嘅揮春、書法作品,都係出自羅先生手筆。羅生仲作左幾句詩,勸戒人唔好偷農作物。入到農莊唔單止吸收到自然氣息,仲有濃厚嘅書卷氣。

講返農場,「悅來農莊」沿用有機耕作嘅方法,拒絕用化學肥料同農藥,推廣可持續農業。農田種左唔同種類嘅蔬果,例如西洋菜、合掌瓜、木瓜、荷蘭豆等等。呢種方法叫混養,可以防止一種作物完全吸收曬泥土某一種養分,保持泥土嘅肥力。大家會留意到農場內一個個藍色水桶,上面用蓋掩著,原來係農夫自製的堆肥桶。羅先生定期去街市搜集檔主唔要嘅魚內臟,如魚腸、魚鰓進行堆肥,將廢物轉化成有用嘅天然肥料,滋養泥土。用天然肥料代替化學肥料,唔單止能保護環境,更重要係令顧客食得健康。

大家睇到呢度,係咪好想即刻試下悅來出品嘅蔬果呢?不過,要留意一點,農莊農嘅作物唔會外銷。其中一個原因係蔬果唔會添加防腐劑,運輸過程可能腐爛。顧客即場買可以確保新鮮。另外,亦可以減少包裝同運輸造成嘅浪費。蔬菜售賣清單可留意「悅來農莊」的Facebook專頁。https://www.facebook.com/%E6%82%85%E4%BE%86%E8%BE%B2%E8%8E%8A-330930047105213/

咁怕唔怕無人買?羅生話唔愁無生意,佢自信咁話:「買過的人都會回來再買,因為有機耕種的味道一定鮮甜可口。」的確,小編當日觀察,真係唔少顧客慕名黎幫襯。小編當日想買油麥菜,羅生俾小編跟埋過去菜田揀菜,仲可以試下摘新鮮蔬菜。羅生好樂意俾顧客接觸農地,加深對農業嘅認識。希望大家尊重農夫嘅心血,即使可以周圍行,都要「眼看手勿動」,唔好破壞任何農作物。

本地遊其實唔係單純打卡影相,透過主動探索,或者可以發掘到更多。好似小編誤打誤撞去到農莊,認識到文青農夫先生,更加可以了解本地農業、有機耕作模式。下次去郊外影相之餘,不妨深入了解當地嘅人文風情,試下同當地人展開話題,可能會有更深刻嘅得著。

小記:聽講「悅來農莊」呢個名大有來頭,同孔子有關!想知道嘅話,大家要親身去問問羅生喇~

交通資訊

在川龍街乘80號小巴前往,坐約20分鐘到終點站

端記茶樓:荃灣荃錦公路川龍村57-58號

彩龍茶樓:荃灣荃錦公路川龍村27號

悅來農莊:荃灣大帽山川龍村橫龍1B

備註事項

地圖

其他相似景點