海天一色
由於赤徑位置偏遠，所以原始風貌都無受到破壞，企喺赤徑嘅渡頭，望住連綿起伏嘅山巒同藍天白雲，真係一件賞心樂事！而且赤徑處於內海灣，所以海面都好平靜㗎！翠綠嘅山嶺同清澈嘅水流好容易令人諗起外國嘅健行步道，咁多位不妨嚟返次低碳微旅行，喺香港感受下可以媲美外國湖光山色嘅風景！
水清見底
赤徑附近有條叫流水岩嘅小溪，源於西貢東郊野公園嘅山谷，一直流到赤徑灣，同大海匯合。因為上游人煙稀疏，所以水質優良，沿岸水清見底。
露營勝地
雖然由北潭坳起步，要行大約一個鐘先到赤徑，不過仍然無阻露營愛好者嚟到赤徑露營。赤徑除咗地方遼闊之外，配套亦都尚算充足，有廁所同水源供應，附近亦都有青年旅社供旅人入住。