❸ 本文內容摘自第三方資料,僅供行程參考之用。

鴨脷洲

十八區大步走
景點分類

城中秘景

所在地區

香港島

建議遊覽時間

2

小時

遠足徑難度

1

最後更新日期

7/8/17

交通資訊
備註事項
地圖

鴨脷洲

十八區大步走

之前有網上好hit嘅一句「屯門?係咪有牛架?」,顯示出大家對比較遠嘅地方充滿無限想像。想說我地有位成員有個朋友住喺鴨脷洲,佢話成日介紹自己住邊嘅時候都會俾人問「下,住離島搭船返學咪好遠?」鴨脷洲呢個地方名可能大家都聽過,但係至於鴨脷洲喺邊、有咩玩,就真係冇乜人知,甚至可能以為鴨脷洲好似長洲咁係離島添!

其實呢,鴨脷洲係位於香港仔隔離嘅一個小島,同香港仔一樣屬於南區;鴨脷洲喺開埠嘅時候就連同香港島一齊交左俾英國管治,所以好早已經開始有完善嘅發展架喇!呢度以前早期係火藥庫、油庫同發電廠,但隨住房屋需求增加,發電廠就搬左去南丫島;而鴨島島上就開始大興土木,興建公屋私樓同埋位於南部嘅工業區。唔講唔知,鴨脷洲都有一樣世界級紀錄,就係佢地全世界人口密度第二高嘅島嶼呀!回應番啱啱個問題啦,其實鴨脷洲嘅交通都算係幾方便,同香港仔只係一橋之隔,行路嘅話十分鐘都去到香港仔。南港島綫(東段)通咗車,我地去鴨脷洲可以喺金鐘坐車去到海怡站或者利東站落車,認真十分方便!

講到鴨脷洲咁方便,大家平時又可能好少有機會去過,梗係要趁機介紹下呢度有咩好做好玩啦。雖然鴨脷洲係全世界人口最密嘅島 (如果只計1平方公里以上嘅島嶼),但係又唔係真係咁迫;所謂麻雀雖小,五臟俱全,島上有好大嘅公園、食街、Shopping嘅地方,仲有最重要嘅係,有得行山!

原來鴨脷洲喺明朝嘅時候已經有人定居,一直以來居民都係已捕魚為生,更加同香港仔一齊成為香港最重要嘅發原地;所以島上有兩座古廟,分別係洪聖廟同水月宮,鐘意歷史嘅朋友就唔好錯過喇!講起漁港,政府喺2009年就喺大街海傍起左風之搭公園,裏面加左好多主題元素紀念漁村文化,大家可以到海傍吹吹風,影影相,記識香港之餘又可以嘆下世界,仲有街渡搭去香港仔架。至於食街就梗係講緊鴨脷洲大街啦!雖然只係一條短短嘅街好似冇乜特別,但係勝在夠平民化;行到餓就去補給下啦!海怡半島係全島最大嘅私人屋苑,有大商場可以行街睇戲食飯;唔夠候的話更加可以去遠啲,入工業區睇下Outlets添。

上文講到鴨脷洲有山行?冇錯!可能甚至住喺南區嘅朋友都未必知添。鴨脷洲南部有座小山叫做玉桂山,行到出去可以見到一望無際嘅海同連島沙洲架!詳情可以參考我地之前嘅詳文介紹:https://www.facebook.com/vairhk/posts/1697817460479856

雖然香港只係彈丸之地,但係可能好多地方大家都聽過但冇去過,甚至唔知喺邊。但其實香港可以話每一度都好有特色,只要大家一齊去發掘,就邊度都咁好玩啦!

鳴謝 Lawrence Tam, Wikimedia Commons 提供相片

交通資訊

巴士

90 鴨脷洲邨 ↔ 中環(交易廣場)

91 鴨脷洲邨 ↔ 中環碼頭

94A 華富(中) ↺ 利東邨

95 鴨脷洲邨/鴨脷洲(利南道工業區) ↺ 石排灣邨

95C 鴨脷洲邨 ↺ 置富花園

96 利東邨 ↔ 銅鑼灣(摩頓台)

97 利東邨 ↔ 中環(交易廣場)

97A 利東邨/鴨脷洲大街 ↺ 深灣

98 利東邨 ↔ 香港仔(成都道)

專線小巴

27 鴨脷洲(惠風街) ↔ 香港仔(西安街)

29 鴨脷洲邨 ↺ 深灣

36S 鴨脷洲海旁道(南灣) ↔ 銅鑼灣(利園山道)

36X 鴨脷洲(平瀾街) ↔ 銅鑼灣(利園山道)

37 鴨脷洲(平瀾街) ↺ 利東邨/鴨脷洲邨

37A 鴨脷洲(平瀾街) ↺ 鴨脷洲邨/利東邨

38 香港仔(西安街) ↺ 利東邨 通宵服務

39C 漁安苑 ↔ 香港仔中心

39M 漁安苑 ↔ 天后站

39S 利東邨/深灣軒 ↔ 香港仔中心

備註事項

地圖

其他相似景點