三月杜鵑花正紅

三月杜鵑花正紅

專題分類
賞城文誌
最後更新日期
10/8/17

踏入春季,萬物生機中有唔少植物開花爭妍鬥麗。而其中一種香港最常見,又開到非常燦爛嘅就係杜鵑花。 香港大部分見到嘅杜鵑花都係本地原生灌木,三四月就係佢地嘅花期,一開就開到密密麻麻,好多山頭、公園、甚至路邊都會見到佢地嘅蹤影架!

詩人白居易用「花中西施」嚟形容杜鵑花,佢嘅艷麗當然係無庸置疑啦。杜鵑通常都係較矮的灌木,大部分嘅品種有橄欖形嘅樹葉;而花通常都係白色、紅色、紫色,有五塊花瓣,上面有斑點;一朵花有半隻手掌咁大,算係非常易認。不過,其實杜鵑係好多種唔同品種嘅總稱,有成 900 種咁多,遍佈世界各地,花瓣、葉嘅形態雖然相似但各有不同。而香港常見嘅品種有六種,包括南華杜鵑、毛葉杜鵑、香港杜鵑、華麗杜鵑、紅杜鵑同埋羊角杜鵑。而香港嘅公園亦都有來自世界各地嘅品種,例如白杜鵑、錦繡杜鵑等等。至於點樣用佢哋嘅葉同埋花嘅特徵去分辨佢哋,就可以參考以下嘅文章:https://www.hk01.com/社區/13393/-認識時花-初春賞杜鵑-認花入門有法

喺公園裏面嘅杜鵑,大家都非常容易見到;咁香港遊有冇野生嘅杜鵑呢?當然有啦!其中馬鞍山吊手岩一帶,係出名賞花嘅地方,唔少植物愛好者都會專程爬上山一睹春季杜鵑盛開的情景。可惜小編農曆新年假嘅時候上山杜鵑未開曬花,錯過咗咁美麗嘅花海啦…… 不過返番正題:杜鵑係「馬鞍山三寶」之一(另外兩寶係赤麂同礦石),咁係因為馬鞍山山勢陡峭、土壤唔深、泥土呈酸性;而杜鵑花鍾意喺有陽光同埋酸性泥土生長,所以嗰度就孕育咗一個咁大嘅杜鵑花群啦。

原來杜鵑花仲有一個好有趣嘅名稱,叫做騰雞花!相傳呢個名係上一代嘅香港大學學生改嘅。咁係因為杜鵑花喺三四月開花,亦都係各位莘莘學子開始要準備考試、論文嘅日子。見到花開嘅時候,學生就會好自然咁聯想起考試,所以就改咗名叫做騰雞花啦!

大家屋企附近又搵唔搵到杜鵑花嘅蹤影呢?如果有都可以影相,都可以同大家分享吓啊!