【口述歷史】 石頭他朝成翡翠

作者
V'air Hong Kong
更新日期
13/8/2020

近排匿埋係屋企,收菜、睇片,日日你眼望我眼,真係你唔悶我都悶。 今個夏天,不如試下同屋企人傾下計,講下故仔,回味想當年啦!

咁點樣開始啊?

我哋可以由執屋搵到個本相簿、個一盒你從來冇打開過嘅古典木盒開始,你可能會發現好多你從來未聽過嘅故事,由一個銀幣而意外發現祖先以前啲威水史。

如果啲物件唔係身邊,不妨試吓上康樂及文化事務署同香港賽馬會慈善信託基金合辦嘅網站╴香港回憶,𥚃面由香港戰前到近代部份街道歷史都有,每一張都係珍貴嘅歷史回憶。透過呢一啲相片,配上家人嘅個人經歷故事,相信會比睇解說牌更加深刻。好似透過一張徙置區嘅相,你可能會聽到當年阿公阿婆點樣由木屋搬到徙置區、搭火車行田基燒香拜山嘅路係幾咁漫長,又或者只係有一個公仔叫「無衫著」嘅小故事。

一張車票,包含一條鐵路丶一個心情嘅故事。

點解要咁做?

「我睇書睇史料咪得囉,點解要聽佢講?」

呢個答案係啱咗一半,剪報、社評等客觀內容的確可以令我哋更加全面睇清楚事件,只不過佢哋未必真正反應出當時市民真正嘅睇法或感受。而口述歷史正正可以填補呢個狀況,透過個人經歷,側面描寫出香港歷史,以街鄰街里嘅角度,睇吓充滿人情味嘅舊時香港。

每一門科目,都代表當時社會嘅風氣狀況。例如尺牘,就係教導書寫傳統信件嘅學問。

每一個人都係歷史嘅一部份,而每個人對同一件事都有唔同睇法,透過口述歷史,我哋可以了解到歷史嘅複雜性同多元性,亦加深了解市民嘅生活情況。同時間,了解家族歷史亦都可以幫助你對自己嘅出身有唔同嘅睇法,亦都有助將歷史流傳俾下一代。

不如由今日起,踏出第一步,話唔定收穫比你想像中仲更加豐富!


參考自 香港回憶:
https://www.hkmemory.hk