新年快樂！V’air 仝人祝大家身體健康、心想事成！
相信唔少朋友都會趁假期離港外遊，其實留港過新年都有好多選擇；大家不妨參考下我哋嘅路線，去勻港九新界、行返個大運！留港遊玩都可以盡情享受假期，仲可以減少碳排放，為環保出一分力架！
01 香港島：灣仔色彩遊
https://www.vairhk.com/places/wanchairainbow
農曆新年周圍都會佈置到紅噹噹，喜氣洋洋咁！灣仔就有一列彩虹唐樓，係影靚相打卡嘅好地方，附近一帶仲有香港歷史最悠久嘅郵局，係法定古蹟，仲要被活化成為環境資源中心添！跟住呢條路線仲可以行入灣仔地標去睇藍屋，不過留意返「香港故事館」初一至初二都係休息嘅！如果想輕輕鬆鬆來一趟城市遊，去灣仔回味舊香港就最適合不過喇！
02 新界：西貢大嶺峒
https://www.vairhk.com/places/tailengtung
農曆新年假期想避吓人潮，過一個Relax嘅新年，不妨用一個下午嘅時間登上香港高峰大嶺峒，欣賞下無敵大海景啦。由清水灣出發，大概行一個半鐘，就可以登上位於西貢嘅大嶺峒小山峰。登上高處，唔單止可以睇到綿綿無盡嘅海岸線，仲有萬里無雲嘅藍天，真係一次過飽覽曬海天連成一線嘅牛尾海海景！
03 九龍：鯉魚門、炮台山
https://www.vairhk.com/places/leiyuemun
https://www.vairhk.com/places/devilspeak
維港嘅景色世界知名，不過除左上山頂之外，又有冇其他地方選擇呢？登上位於油塘同調景嶺中間嘅炮台山（魔鬼山）山頂，就可以用另一個角度睇到維港景色喇；沿途嘅山路都舖好哂石級欄杆，就算係一家大細都可以應付自如。 沿途指示牌非常清晰，每個路口都有寫住炮台山點去，就算係初次登高都絕對冇問題！炮台山山腳就係鯉魚門三家村，如果大家行完覺得唔夠喉，都可以順道一遊三家村，睇吓海景、感受吓漁村風味，等酒樓啟市去仲可以試吓馳名海鮮添！
（記住自己垃圾自己帶走，做個愛護環境嘅好旅人！）